यऊ मालिक
बड़का गलती भ' गेल
एगो सपना देख लेलियइ..
देखलियइ जे
भरि पेट खेलियइए....
छौड़ा-छौडी
ओकर सबहक माय
सब खेलकइ
भरि पेट/भरि मोन..
बड्ड नजायज भ' गेल
एहन सपना देख लेलियइ..
की करियौ मालिक
आँखियो के बुझाइए कान भ' गेलैए
सुनय लगलइए अंतड़ीक कुहरब
तैं बुझाइए देख लेलकइ
बेहुद्दा
एहन अनर्गल स्वप्न
बड़का गलती भेल
दंड भेटबेक चाही
उचिते छैक
ऐना फेर नईं होअय
ताहि लेल दरखास सरकार
खीच लिय' हमर अंतड़ी
आ -
फ़ोड़ि दिय' आँखि
यऊ मालिक
बड़का गलती भ' गेल....
मनोज
सिकंदराबाद
१९/०७/२०१०
No comments:
Post a Comment