अनामिका भरि राति करौट फेरइत रहलि। ओछाओन पर कछमछ करैत रहलि। निन्न नहिंए भेलहि ओकरा।
कल्हुका बिहाड़ि एखन धरि थम्हल नहिं रहइक। साँय-साँय बसात बहैत रहइक मोन मे। किछु अनर्गल होयबाक संभावना भयाक्रांत केने रहैक। बुझाइत रहइक जेना सब किछु समाप्त होबय बाला होइक। सब किछु....
कहुना भोर भेलैक। आन दिन सँ पहिनहिं ओछाओन छोड़ि देलक अनामिका। उठितहि नहा-सुना कऽ भनसा घर में पईसल आ जलखई-टिफिनक ओरिआओन मे लागि गेलि। पहिने ७ बजे मुन्नूक स्कूल बस औतहि। तकर बाद ९ बजे प्रकाशक कार्यालय जेबाक बेर होयतहि। एखन समय छैक, मुदा स्वयं के कोनो काज मे ओझरा कऽ राखऽ चाहैत रहय ओ। प्रकाशक ध्यान अबितहिं मोनक बिहाड़ि आओर द्रुत गति धऽ लेलकहि।
आई चाहो नहिं पीने छलि एखन धरि। आन दिन भिनसरे उठिते सब सँ पहिने चाहे पीबैत छल ओ, तकर बादे आन कोनो चर्जा। मुदा आई सेहो बिसरा गेल रहैक। भेलहि जे चाह पीत तऽ संभवतः मोन कने शांत हेतहि। चाह बनओलक, पीबो कयलक। मुदा कोनो असर नहिं। पश्चाताप आ भय सँ मिज्झर भेल मनःस्थिति यातना दैते रहलहि।
मुन्नू केँ उठौलक आ स्नान करा कऽ स्कूल जयबा लेल तैयार करओलक। जलखै करा कऽ ओकरा बस मे बाईसा कऽ घर आपिस आयलि तँ देखलक जे प्रकाश दाँत माँजि रहल छल। प्रकाश कें चाह बना कऽ देलकहि आ चुप्पे चाप ओकरा लग बैसि गेलि। आँखि मिलेबाक साहस नहिं होइत रहैक।
प्रकाश पुछबो केलकहि "राति मे निन्न नहिं भेल की? आँखि दूनू लाल भेल अछि। "
आँखि निहुँरौनहिं अनामिका उतारा देलकहि "हॅं, ठीक सँ सूति नहिं सकलहुं"।
"कियैक, की भेल से? मोन ठीक अछि?" चाहक चुस्की लैत पुछलकहि प्रकाश।
"मोने कने भरियायल बुझाइत अछि। मुदा अहाँ फिकिर जुनि करू। हरारति सँ भऽ गेल हएत, ठीक भऽ जायत।"
चाहक कप टेबुल पर राखि बिहुँसैत बाजल प्रकाश "से एहन की केने रही जे हरारति भऽ गेल?"
अइ बेर कोनो उतारा नहिं देलकहि अनामिका। खाली कप उठा कऽ भनसा घर दीसि चलि गेलि।
प्रकाश कोनो विशेष ध्यान नहिं देलक। भेलै जे निन्न नहिं भेल छैक ठीक सँ तएँ मने मोन खिजायल छैक, एखन आर चौल करब ठीक नहिं। ओ अखबार पढ़ऽ लागल।
ऑफिसक लेल तैयार भऽ कऽ प्रकाश जलपान कयलक। डाइनिंग टेबुलक दोसर कुर्सी पर अनामिका ओहिना माथ निहुँरौने बैसलि छलि। प्रकाश केँ किछु अनसोहाँत लगलहि । निन्न नहिं भेलैक तऽ मोन भरियायल छैक, से तँ ठीक। मुदा एक्के बेर ऐना गुमसुम किएक अछि अनामिका? ऐना तँ पहिने कहियो नहिं भेल रहय। जहिया अस्पताल मे भर्ती छलि तहियो बिहुँसैत रहैत छलि, ठट्ठा करैत छलि। एना गुमसुम रहब तँ एकदम ओकर स्वभावक विपरीत छैक। अंदेसा होमऽ लगलैक प्रकाश केँ।
पुनः जिज्ञासा केलकहि प्रकाश "बाजू ने की बात अछि? हमरा सँ कोनो अपराध भेल अछि की?"
हृदय कलपि उठलहि अनामिका केँ। अपराध बोध सँ तऽ ओ स्वयं ग्रसित छलि। बाजलि "ई की कहइत छी अहाँ? अहाँ सँ कोनो अपराध भैये नहिं सकैत अछि। कियेक फिरिसान होइत छी एना? कहलहुँ ने, मोन कनी भरियायल अछि। कने काल सूति रहब तँ ठीक भऽ जायत। "
किछु गंभीर भऽ कऽ बाजल प्रकाश " फिरिसान नहिं , मुदा हँ! किछु चिंतित अवश्य छी। अहाँ के एना देखबाक आदति नहिं अछि हमरा। आ चिंता हमरा नहिं हएत तऽ ककरा हेतइ ? हमरा एखनहुँ लागि रहल अछि जे अहाँ हमरा सँ कोनो बात नुका रहल छी। जे किछु बात छैक से कहि दियऽ। मोन हल्लुक भऽ जायत। हमरा नहिं कहब तऽ ककरा कहबहि? जीवन-संगी छी हम अहाँक, जीवन पर्यन्तक संगिनी छी अहाँ हमर। "
स्वयं के सम्हारब असाध्य भऽ रहल छलैक अनामिका केँ। प्रकाशक गप्प सूनि कऽ बुझेलहि जेना कना जेतहि। परिस्थिति केँ सम्हारबाक प्रयास करइत बाजलि "चिंता जुनि करू। किछु नहिं भेलए हमरा। कोनो बात नहिं अछि। जे किछु कने-मने मोन भारी अछि से लगले ठीक भऽ जाएत। अहाँ निश्चिन्त भऽ कऽ ऑफिस जाऊ, अबेर भऽ रहल अछि।"
किछु आश्वस्त होइत प्रकाश बैग के कन्हा पर लटकओलक आ ऑफिसक लेल बिदा भेल। ठीके अबेर होइत रहैक।
प्रकाश केँ मुख्य दुआरि तक अरियाति कऽ अनामिका आबि कऽ सोफा पर बैसि रहलि। भेलई जे एहि मानसिक बिहाड़ि मे ओकर मस्तिष्क फाटि जेतैक। कहुना एहि बिहाड़ि के थम्हेनाइ आवश्यक बुझाय पड़लहि ओकरा। एहि मादे पहिने टी.वी. चालू कएलक आ कईएकटा चैनल बदलि-बदलि कऽ देखलक। मुदा किछु नीक नहिं लगलैक। आन दीन प्रकाशक ऑफिस जयबाक बाद घंटो घंटा धारावाहिक सबहक एपिसोड देखैत छलि। बड्ड नीक लगैत छलैक ओकरा ई सभ धारावाहिक। प्रकाश खौंझाइतो छलैक मुदा अनमिकाक लेल धनि सन। मुदा आई ओकरा सब अनसोहाँत लागि रहल छलैक। टी.वी. बन्न कऽ देलक अनामिका।
उठि कऽ बरण्डा दीसि गेलि। घरक छहरदेवारीक बाहर पूब दीस सँ एकटा विशालकाय पीपरक गाछ रहैक। गाछ पर मारिते रास चिड़ै सभ खोंता बनओने रहैक। ओहि चिड़ै-चुनमुनिक चिहुँकब सूनि कऽ बड्ड आनन्द भेटईक अनामिका केँ। पीपर गाछक विशालता ओकरा जीवन-दर्शनक बोध करओबही। मुदा आई से नहिं भेलैक। ने चिड़ै-चुनमुनिक मधुर स्वर ओकर मोन केँ शांत कऽ सकलहि आ ने पीपरक जीवन-दर्शन। ओकरा बुझएलै जेना पीपरक पातक झुरमुठ मे ओकर मोन आर ओझरा रहल छैक।
ओ अपन कमरा मे आबि कऽ पड़ि रहलि। मोनक अशांति केर नहिं जानि केहन अस्त्र होइत छैक जे उदराग्नि के पूर्णतः नष्ट कऽ दैत छैक। आ सैह भेल रहइक अनामिकाक संग। आइ जलखइयो नहिं कयल भेलैक। निन्न एखनहुँ नहिं भऽ रहल छलैकए। कतबहुँ प्रयास कयलक मुदा भितरका चक्रवात निद्रा के ओकर आँखि मे नहियें पैसऽ देलकहि।
स्मृति घीचि कऽ लऽ गेलहि परसू रतुका ओहि फोन कॉल दीसि। अमरेंद्र भाई फोन केने रहथिन प्रकश केँ। अमरेंद्र माने प्रकाशक पितियौत, जे ओही शहर के एकटा दोसर मोहल्ला मे रहैत छलाह अपन माय आ अनुजक संग। पत्नीक स्वर्गवास भऽ गेल रहन्हि आ छोटका भाय हुनके संग रहि कऽ कम्पटीशनक तैयारी क रहल छलैन्ह। माय के मोन खराब छलैन्ह किछु दिन सँ। हुनके समाद देबय लेल फोन केने रहथिन अमरेंद्र भाई। अनामिका केँ बड्ड मानथिन हुनक माय। समाद देने रहथिन जे पुतहु सँ भेंट करबाक बड्ड इच्छा भऽ रहल छैन्ह, से किछुओ काल लेल अबस्से चलि आबथि अनामिका जते शीघ्र संभव भऽ सकनि।
प्रकाश समाद प्रेषित केने रहैक पत्नी केँ। अनामिका तुरन्त मानि गेल रहय। सासु मायक सन स्नेह करैत छलखिन्हए ओकरा। ओकरो किछु दिन सँ इच्छा भऽ रहल छलैकए बूढ़ी सँ भेंट करबाक। पति के कहलक "काल्हिये चलि जाइत छी काकी सँ भेंट करय लेल। बहुत दिन भऽ गेल हुनका देखना। भिनसर अहाँ के ऑफिस बिदा कयलाक बाद हम काकी ओतय चलि जायब आ दुपहरिया मे मुन्नू के लइत घुरि आयब। "
"निश्चिते जाऊ। अहाँ सँ भेंट करबा लेल मोन लागल छैन्ह काकी केँ" प्रकाश किछु गंभीर होइत बाजल। "अस्वस्थ छैथ, किछु क्षण अहाँक संग भेटतैन्ह तऽ प्रसन्नता हेतैन्ह। मोन हल्लुक हेतैन्ह आ संभव अछि जे स्वास्थ्य मे किछु सुधारहुँ भऽ जानि। हमरा दीसि सँ क्षमा माँगि लेबन्हि आ कहबन्हि जे रबि दीन अबस्से हम जा कऽ भेंट करबन्हि। आवश्यक कॉन्फरेंस चलि रहल अछि ऑफिस मे एखन, सप्ताह भरि एकदम पलखति नहिं अछि। "
से काल्हि ओ गेल छलि काकी सँ भेंट करय लेल। आ ओतहि आयल रहइक ई भयंकर बिहाड़ि जे एखन धरि तहस-नहस मचौने रहैक ओकर अंतःकरण मे…
काकी सँ बहुत दिन पर भेंट भेल छलैक। देखिते काकी हुलसि कऽ पजिया लेने छलखिन्ह ओकरा। कतोक काल तक ओकर मुहेंठ हाथ मे थमने निहारइत रहलखिन्ह अनामिका केँ। छोरलकिन्ह, तहन जा कऽ अवसर भेटल रहइ ओकरा सासु के गोड़ लागय के। बड़ी काल तक दूनू सासु-पुतहु गप्प करैत रहलीह। अमरेंद्र ऑफिस चलि गेल रहैथ आ राजेंद्र भाउज केँ गोड़ लागि क अपन कमरा मे चलि गेल छल पढ़य लेल।
काकी केँ कईएक बरख सँ मधुमेह छलैन्ह। उच्च रक्तचापक सेहो सिकाइत रहैत छलैन्ह। अइ किछु दिन सँ दूनू बढ़ल छलैन्ह। इलाज निरंतर चलि रहल छलैन्ह, आ काल्हि जे खूनक जाँच रिपोर्ट आयल रहन्हि से देखि कऽ डाक्टर कहने रहैन्ह जे आब बहुत सुधार छैन्ह। रक्तचाप सेहो बहुत हद तक सामान्य भऽ गेल रहन्हि।
पुतहु लग किछु आओर सहटि कऽ बईसैत बजलीह बूढ़ी "डाक्टर तँ कहलन्हि जे आब बहुत ठीक छी। आइ अहाँ के देखि लेलहुँ बहुआसिन तँ एकदम्मे चुस्त-दुरुस्त भऽ गेलहुँ। आब आबथु ने जाँच करय लेल!"
बिहुँसि कऽ बाजलि अनामिका "ई तँ बड्ड नीक गप्प काकी, मुदा स्वास्थ्यक ध्यान राकथु ई। आब बयस भऽ गेल छैन्ह, पथ्य-परहेजक बहुत खगता छैन्ह। खाय पीबऽ पर विशेष ध्यान राकथु। "
सासु-पुतहुक गप्प-सप्प चलइत रहलैन्ह। नोकरानी भोजनक ओरियाओन कऽ चलि गेलि। सासु आ देयोरक संगहिँ भोजन कयलक अनामिका। बाहर झिसियाय लागल रहइक। किछु काल आर गप्प-सप्प कयलक सासुक संग आ घर जाय लेल बिदा भेलि तऽ देखलक जे बुन्ना-बुन्नी तेज भऽ गेल रहइक। सासु रोकि लेलखिन्ह। कहलखिन्ह "अइ बरखा मे कोना जायब, भिजिये जयब। कनी काल बिलमि जाऊ, बरखा थम्हतइ तऽ राजेंद्र मोटर साइकिल सँ मुन्नू केँ स्कूल सँ लइत अहाँकेँ डेरा छोड़ि आयत। "
अनामिका मानि गेलि रहय, आ सैह बलाय भऽ गेलैक। मुदा दोसर उपयहुँ की रहैक?
सासु के पयर जाँतऽ लागलि। कनिए काल मे बूढी केँ अओंघी लागि गेलन्हि। अनामिका सोचलक एसगरि की करब? किछु काल देयोरे सँ गप्प-सप्प कऽ समय बिता लेल जाय।
राजेंद्र अपन कमरा मे ओछाओन पर पड़ल पढ़ैत रहय। भाउज केँ देखलक तऽ उठि कऽ बैसि रहल। अनामिका लगे मे राखल कुर्सी पर बैसि गेलि। देयोरक हाल समाचार पुछलक। बातचीत होमऽ लगलहि। भाउज केँ एते लग सँ कखनहुँ नहिं देखने रहय राजेंद्र। अबैत छली तऽ बस गोड़ लागि कऽ निकलि जाति छल। आइयो त सैह केने छल, मुदा आइ स्वयं चलि आयल रहथिन्ह भाउज ओकर कमरा मे। राजेंद्र जुआन छल। देखय-सूनय मे अविरल। गठल शरीर रहइक, अत्यंत आकर्ष। अनामिका केँ ओकरा सँ गप्प कऽ नीक लगलहि।
भाउज सँ गप्प करैत-करैत राजेंद्र के भेलैक जेना ओ भसिया रहल अछि। किछु एहन भऽ रहल छलैक ओकरा जे पहिने कहियो नहिं भेल रहइक। अपना पर सँ नियंत्रण हराय लागल रहइक। अपन समक्ष सौन्दर्यक एहन प्रतिमूर्ति केँ देखि ओ मतांध होमऽ लागल रहय। स्वयं के रोकबाक बहुत चेष्टा कयलक मुदा विफल भऽ गेल। सहटि कऽ अनामिकाक हाथ पकड़ि लेलकहि। मुँह सँ एक्कहि टा शब्द बहरेलइ - "भउजी!"
अनामिका जेना हठात जड़ भऽ गेलि। रोइयाँ ठाड़ भऽ गेलहि। मस्तिष्कक समस्त सोच-प्रक्रिया जेना एकबैग बिला गेलहि। हृदयक स्पंदन सहसा तीव्र भऽ गेलहि आ ओहो ओही उन्माद मे भसियाय लागलि। राजेन्द्रक आकर्षक व्यक्तित्व ओकरा चुम्बक जेना खींचऽ लगलहि। बाहर बरखा बन्न भेलहि आ भीतर बिहाड़िक आगमन भऽ रहल छलैक। अनामिका मदमत्त सन भेलि नहुँए सँ राजेन्द्रक दीसि बढ़य लागलि…
आ सहसा अनामिकाक मस्तिष्क मे जेना कोनो बिजुरी चमकलहि। ओहि बिजुरिक प्रबल इजोत मे ओकरा प्रकाशक मुखाकृति देखाइ पड़लहि। एकबैग जेना चेतना फेर सँ घुरि अएलहि। ओ झट दऽ राजेन्द्रक हाथ सँ अपन हाथ झिकलक आ ठाढ़ि भऽ गेलि। आँखिक सोझा सबटा फरिच्छ भऽ गेल रहइक। एकटा बिहाड़ि थम्हलैक आ दोसर आरंभ भऽ गेलहि। ओकर गत्र -गत्र में पश्चाताप आ भय मिश्रित अन्हर बहय लगलहि।
एहि अकस्मात प्रतिक्रिया सँ राजेन्द्रक भक्क सेहो टुटलहि। जेना अन्हार कोठरी मे केओ प्रकाश-स्रोतक स्विच दबा देने होइ! ओ धम्म सँ भाउजक पयर पर खसि पड़ल। दूनू आँखि सँ झर-झर नोर बहय लगलहि। अवरुद्ध कंठ सँ स्वर बहरेलहि - "क्षमा कऽ दिय भउजी। भारी अनर्थ करय जा रहल छलहुँ। अहाँ बचा लेलहुँ , क्षमा करू भउजी !"
अपन मोन में उधियाइत गर्दा मे भसियाइत अनामिका बाजलि "के ककरा क्षमा करत? अपराधी जतबे अहाँ, ततबे हमहूँ छी!" आ ई कहइत चोट्टहिं बिदा भऽ गेलि अनामिका ओहि घर सँ। सासु सुतले रहथिन्ह। बाहर बाट पर टेम्पो कयलक आ मुन्नू के लइत अपन घर घुरि आयलि। मुदा घर दोसरे सन लागल रहइक ओकरा। बिहाड़ि बहैत रहलहि।
आ सैह बिहाड़ि एखनहुँ बहैत रहइक ओकर अंतर मे। एहि अन्हर के रोकबाक प्रयास करैत रहलि आ विफल होइत रहलि।
कहुँना दिन बितलहि। साँझ भेलहि। प्रकाश ऑफिस सँ घुरल। पत्नी केँ देखलक तँ भिनसरका अवसाद फेर घेर लेलकही। कोनो भाँगठ नहिं। राति भरिक जगरना आ दिन भरिक मानसिक उथल-पुथल अनामिका केर मुहेंठ केँ फूजल किताब बना देने रहइक। बस ओहि किताबक पन्ना पर लीखल भाखा केँ नहिं बूझि पाबि रहल छल प्रकाश।
किछु उत्तेजित होइत पत्नी सँ पुछलक "की भेल अछि से बाजू ने। अहाँ के हम्मर सप्पत!"
पति सप्पत दऽ देलकहि! चक्रव्यूह मे फँसि गेलि छलि अनामिका। निकलबाक कोनो बाट नहिं। ज्वालामुखी फटबे करतहि, सर्वनाश होयबे करतहि। ओ भले राजेंद्र केँ क्षमा क दियै, मुदा प्रकाश ओकरा कहियो क्षमा नहिं करतहि। पति-परित्यक्ता बनत ओ, ओकर भाग्य में आब यैह लीखल छैक। बिहाड़ि अपन चरम पर पहुँचि गेल अछि, ओकर संसार आब ढहबे करतहि। पति सप्पत द देने रहइक, बाजय आब पड़बे करतहि!
बाजलि अनामिका। प्रकाश केँ सबटा कहि सुनओलक आ अंत में अवरुद्ध कंठ सँ एतबे बाजलि "क्षमा याचना करबाक योग्य हम नहिं रहलहुँ। आब अहाँ जे दंड दी से हमरा स्वीकार्य अछि। "
प्रकाश किछु नहिं बाजल। निःशब्द सोफा पर बैसि रहल। किछु काल अहिना बितलहि। अनामिका तेसर बिहाड़िक आशंका में स्तब्ध बैसलि रहलि। आँखि भीजय लागल रहइक ओकर।
कने काल बाद प्रकाश सोफा पर सँ उठल आ बाजल "अहाँ के मोन अछि परुका अहाँ के हर्नियाक ऑपरेशन भेल छल?"
अनामिका अवाक् रही गेल। एहि अवसर पर एहि प्रश्नक की औचित्य? बाजलि "हँ मोन अछि। मुदा एखन ई प्रश्न किएक पुछलहुँ?"
पूर्ण गम्भीरतक संग प्रकाश बाजल "पुछलहुँ एहि कारणे जे एखुनका परिस्थिति मे ई प्रश्न अति महत्वपूर्ण अछि। अहाँ केँ एकटा गंभीर रोग भेल रहय तँय अहाँक ऑपरेशन भेल रहय। जखन हमरा अहाँक रोगक मादे पता चलल तऽ हम अहाँक इलाज करएलहुँ आ की दंड देलहुँ? जहिया कहियो हम दुःखित पड़लहुँ , अहाँ हमर इलाज में संग देलहुँ आ की हमरा दण्डित कएलहुँ?"
अनामिका फेर भौंचक्क! ई की सब बाजि रहल छथि ई! विस्मित भऽ बाजलि "नहिं, से कतहु भेलइए? रोगी केँ तऽ इलाजे होइत छैक, दंड कियैक भेटतहि?" आँखि एखनहुँ भिजले रहइक ओकर।
प्रकाश पुनः बाजल "बाह! प्रश्नक उत्तर देलहुँ आ एकटा प्रश्न सेहो कऽ देलहुँ! बेस, तऽ अहाँक प्रश्नहिं अहाँ केर प्रश्नक उत्तर अछि। दंड कियैक भेटतहि? जहिना शारीरिक दोषक उपचार कयल जाति छैक, दंड नहिं देल जाइत छैक, तहिना मानसिक विकार केँ सेहो उपचारक आवश्यकता होइत छैक। दंडक स्थान कतय छैक एहि में? आ अहाँ केँ तऽ कोनो उपचारहुँ के खगता नहीं अछि, मोनक विकार केँ तऽ अहाँ उपजिते स्वयं नष्ट क देलियैक। जखन आब रोगहि नहिं, त उपचार कथिक? दंडक तऽ कथे कोन? अहाँक मोन मे बस कोनो बात आयल, अहाँ कोनो अपराध नहिं कएलहुं। जखन अपराधे नहिं तऽ दंड कथीक?"
अनामिकाक अश्रुधारक फाटक फूजि गेलैक। झर-झर नोर बहय लगलहि। पति केर सीना मे माथ टिका लेलक। प्रकाश बिहुँसैत पत्नी के प्रेमालिंगन मे बान्हि लेलक।
पीपर गाछ पर बइसल चिड़ै-चुनमुनी सबहक चिहुँकब फेर सँ संगीतमय भऽ गेल रहइक। बिहाड़ि बन्न भऽ गेल रहैक।
