घाम

लगइए
हवा किछु बदलि रहल अछि
कनकनी कने कमलइए
कखनो काल
घामक किछ बुन्न सेहो
अभरि जाइत अछि कपार पर
बदलि त' रहल छैक किछु
निश्चित..

सुनलियइए
अपन आत्मसम्मान पर
ककरो अनर्गल स्पर्श होइतहि
एक वीरांगना
थपड़िया देलकइ मनसा के
बीच बजार मे
सार्वजनिक प्रत्याघात
तत्काल..

सुनलियइए
सुनैत रहैत छी
बीच-बीच मे
भ' रहल छैक पलटवार
सरिपहुँ..

ठीके
हवा बदलि रहल छैक
घामक किछु बुन्न
अभरि रहल छैक
सभतरि...

हैदराबाद
३०/०१/२०१५