पेटझर्री

अजगुत ताल-तमासा देखल
नित्तः पेट झरइए
कतबो गोटी-पाचक खएलहुँ
किछु नहि आब पचइए

चौथा फेल मिनिस्टर देखू
शासन के चलबइए    
 सरकारी अधिकारी सब सँ
तरकारी रन्हबइए

बिन लक्ष्मी गृहलक्ष्मी बारल
ई की ताल  करइए
दू कौड़ी के छौंड़ा देखू
लाखक बाट जोहइए

गामक पढ़ुआ नबतुरिया सब
शहरक बाट धरइए
नानी सँ सूनल खिस्सा केर
नढ़ेया मोन पड़इए

अनकर कोठा ठाड़ करइ  छी
अप्पन घर खसइए
रघुपति पोथी मे भुतियायल  
रावण राज करइए

अप्पन भाषा त्यागल मैथिल
हिन्दीक  ठाड़ी  पङइए
किसुनभोग केर गाछ मे देखू
अल्हुआ आब फरइए

सबटा ताल-तमासा देखल
तैं त' पेट झरइए
कतबो गोटी-पाचक खएलहुँ
किछु नहि आब पचइए


राँची
०२/१०/२००२